ក្នុងកំឡុងឆ្នាំ ២០០៩-២០១៣ អនុវិស័យអប់រំក្រៅប្រព័ន្ធមានការរីកចម្រើន ជាពិសេសអត្រាអក្ខរកម្មយុវជនអាយុ ១៥-២៤ កើនដល់ ៩១,៥ ភាគរយ នៅឆ្នាំ ២០១១។ ចំនួនថ្នាក់អក្ខរកម្មបានថយចុះពី ២១៤១ ថ្នាក់នៅឆ្នាំ ២០០៩ មកត្រឹម ១៥០០ ថ្នាក់នៅឆ្នាំ ២០១១ (ថយចុះ ៣០ ភាគរយ)។ ចំនួនអ្នកសិក្សាបានថយចុះពី ៥២០៧៨ នាក់មកត្រឹម ៣៤៩៦៤ នាក់ (ថយចុះ ៣២ ភាគរយ)។ បរិមាណនេះស្មើនឹង ២,៨ ភាគរយនៃអនក្ខរជន នៅឆ្នាំ ២០១១។ ចំនួនមជ្ឈមណ្ឌលសិក្សាសហគមន៍បានកើនពី ១៥៤ កន្លែងក្នុងឆ្នាំ ២០០៩ ដល់ ៣២១ កន្លែងក្នុងឆ្នាំ ២០១២ ។ ចំនួនថ្នាក់ បណ្តុះបណ្តាលជំនាញបានកើនឡើងពី ១៥៤ ថ្នាក់ទៅដល់ ៦៦៧ ថ្នាក់ ក្នុងនោះជំនាញសិប្បកម្ម ៣៥,៨ ភាគរយ ជំនាញអ៊ុតសក់និងតុបតែង ១៩,៥ ភាគរយ ភ្លេងនិងរបាំ ១៥,១ ភាគរយ ជំនាញម៉ាស៊ីន ១២,៧ ភាគរយ និងជំនាញដទៃទៀត។ ចំនួនសិស្សក្នុងកម្មវិធីចូលរៀនឡើងវិញបានថយចុះពី ២៦១៧៦ នាក់ មកត្រឹម ២១៣៦៦ នាក់ ទាបជាងចំណុចដៅរបស់ ផែនការយុទ្ធសាស្ត្រវិស័យអប់រំ ២២០០០ នាក់។ ក្របខ័ណ្ឌស្ថាប័ននិងគោលនយោបាយត្រូវបានពង្រឹង តាមរយៈ ការពិនិត្យឡើងវិញគោលនយោបាយអប់រំក្រៅប្រព័ន្ធ ការបង្កើតអនុក្រុមការងារអប់រំក្រៅប្រព័ន្ធនិងមានភារកិច្ចច្បាស់លាស់ ការវាយតម្លៃសមត្ថភាពអប់រំក្រៅប្រព័ន្ធនិងការកសាងផែនទី ក៏ដូចជាការពិនិត្យឡើងវិញកម្មវិធីចូលរៀន ឡើងវិញនិងការរៀបចំសេចក្តីណែនាំស្តីពីប្រព័ន្ធព័ត៌មានគ្រប់គ្រងអប់រំក្រៅប្រព័ន្ធនិងកម្មវិធីសមមូល។
