អារម្ភកថា
សៀវភៅស្ថិតិ និងសូចនាករអប់រំឆ្នាំសិក្សា ២០១២-២០១៣ផ្តល់ជូននូវព័ត៌មានជាមូលដ្ឋានអំពីសាលារៀនសាធារណៈ រួមមាន មត្តេយ្យ សិក្សា បឋមសិក្សា និងមធ្យមសិក្សាចំណេះទូទៅនៅទូទាំងប្រទេស។ លោកនាយកសាលារៀនជាអ្នករួមវិភាគទានដ៏សំខាន់ក្នុងការផ្តល់ទិន្នន័យ របស់សាលារៀន។ ការិយាល័យអប់រំយុវជន និងកីឡា ក្រុង ស្រុក ខណ្ឌ និងមន្ទីរអប់រំ យុវជន និងកីឡា រាជធានី ខេត្ត បានជួយពិនិត្យនិងធានា ភាពត្រឹមត្រូវ និងទាន់ពេលវេលារបស់ទិន្នន័យដែលបានចងក្រងក្នុងសៀវភៅនេះ។
ក្រសួងអប់រំ យុវជន និងកីឡា និងដៃគូអភិវឌ្ឍបានសហការធ្វើឱ្យសៀវភៅស្ថិតិ និងសូចនាករអប់រំនេះមានគុណភាពកាន់តែប្រសើរ ឡើងសម្រាប់ប្រើប្រាស់ទាំងថ្នាក់ជាតិ និងអន្តរជាតិ ។ ស្ថិតិ និងសូចនាករ ទាំងនេះជាឧបករណ៍ដ៏មានសារៈសំខាន់សម្រាប់ការពិនិត្យតាមដាន វាយតម្លៃ វិភាគស៊ីជម្រៅ និងការសិក្សាស្រាវជ្រាវ ដើម្បីអភិវឌ្ឍវិស័យអប់រំ។
ក្រសួងអប់រំ យុវជន និងកីឡា សូមថ្លែងអំណរគុណចំពោះវិទ្យាស្ថានជាតិស្ថិតិ នៃក្រសួងផែនការ ដែលបានផ្តល់ទិន្នន័យស្ថិតិប្រជាជនដើម្បីជាមូលដ្ឋានក្នុងការគណនាសូចនាករអប់រំមួយចំនួន។ ជាមួយគ្នានេះ សូមថ្លែងអំណរគុណ ជាពិសេសដល់អង្គការ UNICEF/Sida ដែលបាន និងកំពុងជួយគាំទ្រដល់ការិយាល័យប្រព័ន្ធព័ត៌មានគ្រប់គ្រងអប់រំ (EMIS) ទាំងថវិកានិងបច្ចេកទេស ព្រមទាំងអ្នកប្រើប្រាស់សៀវភៅស្ថិតិនេះ ដែល បានផ្តល់នូវព័ត៌មានត្រឡប់ល្អៗ ដើម្បីជាទុនសម្រាប់កែលម្អការផលិតសៀវភៅស្ថិតិ និងសូចនាករអប់រំ ឱ្យកាន់តែប្រសើរឡើង។
ជាទីបញ្ចប់ ខ្ញុំសូមថ្លែងអំណរគុណដ៏ជ្រាលជ្រៅចំពោះការខិតខំប្រឹងប្រែងរបស់ថ្នាក់ដឹកនាំក្រសួងអប់រំ យុវជន និងកីឡា និងមន្រ្តីជំនាញ ដែលបានជួយរួមចំណែកដល់ការផលិតស្ថិតិ និងសូចនាករអប់រំកាន់តែប្រសើរឡើងពីមួយឆ្នាំទៅមួយឆ្នាំ។
រាជធានីភ្នំពេញ ថ្ងៃទី ៣០ ខែឧសភា ឆ្នាំ២០១៣
រដ្ឋមន្ត្រីក្រសួងអប់រំ យុវជន និងកីឡា
អ៊ឹម សិទ្ធី