សៀវភៅស្ថិតិ និង សូចនាករអប់រំ ឆ្នាំសិក្សា២០១៥-២០១៦ ផ្ដល់ព័ត៌មានជាមូលដ្ឋានអំពីសាលារៀនសាធារណៈ រួមមាន មត្តេយ្យសិក្សា បឋមសិក្សា និងមធ្យមសិក្សាចំណេះទូទៅ នៅទូទាំងប្រទេស។ លោកនាយកសាលារៀនជាអ្នករួមវិភាគទានដ៏សំខាន់ក្នុងការផ្ដល់ទិន្នន័យ របស់សាលារៀន។ ការិយាល័យអប់រំ យុវជន និងកីឡា ក្រុង ស្រុក ខណ្ឌ និងមន្ទីរអប់រំ យុវជន និងកីឡា រាជធានី ខេត្ត បានជួយពិនិត្យ និងធានាភាពត្រឹមត្រូវ និងទាន់ពេលវេលារបស់ទិន្នន័យដែលបានចងក្រងក្នុងសៀវភៅនេះ។
ក្រសួង អប់រំ យុវជន និងកីឡា និងដៃគូអភិវឌ្ឍ បានសហការធ្វើឱ្យសៀវភៅស្ថិតិ និងសូចនាករអប់រំនេះ មានគុណភាពកាន់តែប្រសើរឡើង សម្រាប់ប្រើប្រាស់ទាំងថ្នាក់ជាតិ និងអន្តរជាតិ ។ ស្ថិតិ និងសូចនាករ ទាំងនេះជាឧបករណ៍ដ៏មានសារៈសំខាន់សម្រាប់ការពិនិត្យតាមដានវាយ តម្លៃវិភាគស៊ីជម្រៅ និងការសិក្សាស្រាវជ្រាវ ដើម្បីអភិវឌ្ឍវិស័យអប់រំ។
ក្រសួង អប់រំ យុវជន និងកីឡាសូមថ្លែងអំណរគុណចំពោះវិទ្យាស្ថានជាតិស្ថិតិ នៃក្រសួងផែនការ ដែលបានផ្ដល់ទិន្នន័យស្ថិតិប្រជាជនដើម្បីជាមូលដ្ឋាន ក្នុងការគណនាសូចនាករអប់រំមួយចំនួន ជាពិសេសដល់អង្គការ UNICEF/SWEDEN សហគមន៍អឺរ៉ុប (EU) និងអង្គការដៃគូ អភិវឌ្ឍមួយចំនួនទៀតដែលបាន និងកំពុងជួយគាំទ្រដល់នាយកដ្ឋានប្រព័ន្ធព័ត៌មានគ្រប់គ្រងអប់រំ (DoEMIS) ទាំង ថវិកា និងបច្ចេកទេស ព្រមទាំងអ្នកប្រើប្រាស់សៀវភៅស្ថិតិនេះ ដែលបានផ្ដល់ព័ត៌មានត្រឡប់ល្អៗ ដើម្បីជាទុនសម្រាប់កែលម្អការផលិតសៀវភៅស្ថិតិ និងសូចនាករអប់រំឱ្យកាន់តែប្រសើរឡើង។
ជាទីបញ្ចប់ ខ្ញុំសូមថ្លែងអំណរគុណចំពោះការយកចិត្តទុកដាក់របស់ថ្នាក់ដឹកនាំ ក្រសួងអប់រំ យុវជន និងកីឡា គ្រប់លំដាប់ថ្នាក់ និងមន្ត្រី ជំនាញដែលបានជួយរួមចំណែកដល់ការផលិតស្ថិតិ និង សូចនាករអប់រំឱ្យកាន់តែប្រសើរឡើងពីមួយឆ្នាំទៅមួយឆ្នាំ។
រាជធានីភ្នំពេញ ថ្ងៃទី២៧ ខែមេសា ឆ្នាំ២០១៦
រដ្ឋមន្ត្រីក្រសួងអប់រំ យុវជន និងកីឡា
បណ្ឌិត ហង់ ជួន ណារ៉ុន